Հայաստանը ռուսական շոկոլադի խոշորագույն սպառողների թվում է. ներկրման ծավալները
Հայաստանը ներառվել է ռուսական շոկոլադե արտադրանքի խոշորագույն ներկրողների առաջին հնգյակում։ Այս մասին են վկայում 2025 թվականի հունվար-սեպտեմբեր ամիսների վիճակագրական տվյալները, որոնք հրապարակել է «ՌԻԱ Նովոստի»-ն՝ հղում անելով «Սպուտնիկ Արմենիա»-ին։
Ըստ ուսումնասիրության՝ 2025 թվականի առաջին ինն ամիսների ընթացքում Ռուսաստանից շոկոլադի արտահանման հիմնական ուղղություններն են եղել ԱՊՀ երկրները։
Խոշորագույն գնորդների վարկանիշային աղյուսակը հետևյալն է.
- Ղազախստան– 192 մլն դոլար (բացարձակ առաջատար),
- Բելառուս– 123 մլն դոլար,
- Ուզբեկստան– 68 մլն դոլար,
- Ադրբեջան– 48 մլն դոլար,
- Հայաստան– 28,5 մլն դոլար։
Վիճակագրությունը ցույց է տալիս, որ հայաստանյան շուկայում ռուսական արտադրության քաղցրավենիքը շարունակում է մնալ պահանջված և զբաղեցնել կայուն դիրքեր։ Չնայած ներքին արտադրության զարգացմանը և այլ երկրներից ներկրվող տեսականուն, Ռուսաստանից մատակարարվող շոկոլադի ծավալները Հայաստանին դասում են տարածաշրջանային խոշորագույն սպառողների շարքին։
Հարկ է նշել, որ ռուսական հրուշակեղենի արտահանման ծավալներն աճել են նաև այլ ուղղություններով, սակայն հենց հարևան երկրներն են հանդիսանում ռուսական շոկոլադի հիմնական շուկաները։