Մի՛ շնչեք. Երևանում բողոքի ակցիա կանցկացվի օդի աղտոտվածության դեմ
Երևանում փոշու պարունակությունը օդում վերջին ինը օրերին գերազանցել է թույլատրելի սահմանները։ Սակայն քաղաքային իշխանությունները շարունակում են պնդել, որ Երևանի վատ օդի որակը պայմանավորված չէ շինարարությամբ, այլ հրդեհներով և փայտով ջեռուցվող տներից արտանետումներով։
Երևանի քաղաքապետ Տիգրան Ավինյանը հայտարարել է, որ Երևանում օդի աղտոտվածության բարձր մակարդակը սեզոնային է և պայմանավորված է տարածաշրջանային գործոններով և վերջին հրդեհներով.
«Օդի աղտոտվածությունն այս տարածաշրջանում ունի խիստ սեզոնային բնույթ և պայմանավորված է առավելապես աշխարհագրական գործոններով՝ օդային զանգվածների շրջանառությամբ, չոր անտիցիկլոնային եղանակով և գլխավորապես հարավ-արևելքից չոր, փոշոտ օդային զանգվածների մուտքով և ռելիեֆային պայմաններով: Դրանց գումարվել է նաև տարվա այս սեզոնին ջեռուցման, հրդեհների, այրումների արդյունքում տարբեր գազերի, օրգանական փոշու, ծխի ավելացումը օդում, որը օդափոխանակության բացակայության պայմաններում ավելի է սրում իրավիճակը։», — բացատրել է Ավինյանը։
Սակայն ոչ ոք չի հավատում քաղաքապետի խոսքերին, և քաղաքային իշխանությունները այս հայտարարություններից հետո սոցիալական ցանցերում ավելի շատ քննադատության են ենթարկվել։
Այս հրատապ հարցին անդրադարձել է նաև ՀՀ վարչապետ Նիկոլ Փաշինյանը։ Նա հայտարարել է, որ Երևանում կստեղծվեն երկու աշխատանքային խմբեր՝ օդի աղտոտվածության և երթևեկության խնդիրները լուծելու համար։
«Հաշվի առնելով այս թեմայի քննարկումը սոցիալական ցանցերում և մամուլում, ինչպես նաև հասարակության մեջ, և հիմնվելով իմ սեփական դիտարկումների վրա՝ ես եզրակացրել եմ, որ անհրաժեշտ են երկու աշխատանքային խմբեր։ Մեկը կզբաղվի օդի աղտոտվածությամբ, իսկ մյուսը՝ երթևեկության կառավարման և գերբեռնվածության հարցերով։ Քաղաքացիական հասարակության և փորձագիտական շրջանակների ներկայացուցիչները կներգրավվեն այս խմբերի աշխատանքներում», — նշել է Փաշինյանը։
Մինչ իշխանությունները զբաղված են հայտարարություններով, ակտիվիստները նախատեսում են բողոքի ակցիա անցկացնել Երևանում այս կիրակի՝ նոյեմբերի 30-ին, ժամը 14:00-ին: Այն նվիրված է օդի որակին։ Ակցիան կանցկացվի Հանրապետության հրապարակում։
Մասնակիցները նախատեսում են դիմակներով երթ անցկացնել ՝ այդպիսով ուշադրություն հրավիրելով շրջակա միջավայրի իրավիճակի վրա։