Հայաստանի պետական կամերային նվագախումբը ներկայացնում է «Բիսեր. լավագույն գլուխգործոցները ջութակի վիրտուոզի կատարմամբ» համերգը

2025 թվականի դեկտեմբերի 1-ին, ժամը 19:00-ին, «Արամ Խաչատրյան» համերգասրահում տեղի կունենա բացառիկ երաժշտական երեկո, որը կազմակերպել է Հայաստանի պետական կամերային նվագախումբը։ «Բիսեր. լավագույն գլուխգործոցները ջութակի վիրտուոզի կատարմամբ» խորագիրը կրող համերգը խոստանում է իսկական տոն դառնալ դասական երաժշտության երկրպագուների համար։

Երեկոյի գլխավոր մենակատարն է ջութակահար, ՀՀ վաստակավոր արտիստ և Գինեսի ռեկորդակիր Նիկոլայ Մադոյանը, ում վիրտուոզ կատարումները մշտապես գերում են ունկնդիրների սրտերը։

Համերգային ծրագրում կհնչեն մեծանուն կոմպոզիտորներ Արամ Խաչատրյանի, Անտոնիո Վիվալդիի, Նիկոլո Պագանինիի, Պյոտր Չայկովսկու, Սերգեյ Ռախմանինովի, Ջոակինո Ռոսինիի, Կամիլ Սեն-Սանսի և համաշխարհային դասական այլ վարպետների գլուխգործոցները։ Երաժշտական նվագակցությունը կապահովի Պետական կամերային նվագախումբը՝ իսպանացի դիրիժոր Խուան Անտոնիո Ռամիրեսի ղեկավարությամբ։

Կազմակերպիչները սիրով հրավիրում են բոլոր երաժշտասերներին՝ վայելելու կրքով, վիրտուոզությամբ և համաշխարհային հռչակ վայելող «բիս»-երով լի երեկոն՝ այն ստեղծագործությունները, որոնք հանդիսատեսը սովորաբար պահանջում է բուռն ծափահարություններով։

Համերգի սկիզբը՝ 19:00-ին։
Մուտքը՝ մինչև 6 տարեկան երեխաների համար արգելվում է։
Տոմսերի արժեքը՝ 3 000-ից 15 000 դրամ։