Հայ ձյուդոիստները կմասնակցեն Թբիլիսիի «Մեծ սաղավարտ» մրցաշարին

Ձյուդոյի Հայաստանի ազգային հավաքականը պատրաստվում է գարնանային մրցաշրջանի կարևորագույն մեկնարկներից մեկին։ Հովհաննես Դավթյանի գլխավորած թիմն արդեն ավարտել է Չեխիայի Նիմբուրգ քաղաքում անցկացված օլիմպիական մարզումային ճամբարի հավաքը և վերադարձել Երևան։

Ըստ ՀԱՕԿ լրատվականի՝ մարտի 18-ին մեր ընտրանին կմեկնի Վրաստանի մայրաքաղաք, որտեղ մարտի 19-23-ը կկայանա հեղինակավոր «Մեծ սաղավարտ» (Grand Slam) միջազգային մրցաշարը։

Հայաստանը Թբիլիսիում կներկայացնեն 4 մարզիկներ.

• Վահե Աղասյան (60 կգ)
• Մարտին Բադալյան (60 կգ)
• Արտակ Թորոսյան (73 կգ)
• Գոռ Կարապետյան (100 կգ)

Մրցաշարի ավարտից հետո հայ ձյուդոիստները կմնան Թբիլիսիում՝ մասնակցելու նաև միջազգային կարճատև ուսումնամարզական հավաքի՝ մարզավիճակը պահպանելու և փորձի փոխանակման նպատակով։