Հայաստանում գործարկվում է 2%-ոց հետվճարային ծրագիր՝ անկանխիկ վճարումների խթանման համար

ՀՀ կառավարությունը հաստատեց ֆիզիկական անձանց կողմից արքա վճարային համակարգով կատարված անկանխիկ վճարումների հետվճար տրամադրելու նոր միջոցառումը։ Այս մասին զեկուցեց ֆինանսների նախարար Վահե Հովհաննիսյանը։ Նախարարի խոսքով՝ ծրագիրը նպատակ ունի խթանել անկանխիկ եղանակով գործարքների կատարման հաճախականությունը և բարելավել սպառողների ֆինանսական ու տեխնոլոգիական գիտելիքները։

«Ծրագրի շրջանակում սպառողները հնարավորություն կունենան ապրանքներն ու ծառայությունները ձեռք բերել 2%-ով էժան՝ օգտագործելով արքա վճարային քարտը»,- նշեց Վահե Հովհաննիսյանը:

Միջոցառման շահառու կարող է լինել ցանկացած ֆիզիկական անձ, ով ունի բանկային հաշիվ և դրան կցված արքա վճարային քարտ։ Ծրագիրը սկսվելու է 2026 թվականի հունվարի 1-ից և կավարտվի 2026 թվականի դեկտեմբերի 31-ին։ Հետվճարները վճարվելու են ինքնաշխատ եղանակով՝ ամսվա 25-ին՝ նախորդ ամսվա գործարքների հիման վրա։

Վահե Հովհաննիսյանը մանրամասնեց. «Հետվճար տրամադրվում է 1000 դրամը գերազանցող գործարքների դիմաց։ Յուրաքանչյուր գործի համար հետվճարը չի կարող գերազանցել 6000 դրամը, իսկ մեկ ամսվա համար՝ 60 000 դրամը։ Հետվճարի կեսը վճարվում է պետական բյուջեից, իսկ մյուս կեսը՝ Armenian Card ՓԲ-ի միջոցներից»:

Նախարարն ընդգծեց նաև բացառությունները. Մասնավորապես, հետվճար չի տրամադրվելու կոմունալ ծառայությունների, պետական և համայնքային բյուջեների վճարումների, բարձր ռիսկային վաճառակետերում կատարված գործարքների, ֆինանսական կազմակերպությունների ծառայությունների դիմաց, արքանվեր և մեկանգամյա օգտագործման քարտերով կատարված գործարքների համար»: «Անհրաժեշտ է նկատել, որ նախկինում վճարված հետվճարները նվազեցվելու են ընթացիկ ամսվա ընթացքում վճարվելիք հետվճարներից»,- հավելեց նա:

Նախարարն ընդգծեց, որ ներկայումս ծրագիրը տարածվելու է միայն արքա քարտերի վրա. «Համատեղ քարտեր դեռ չկան, բայց երբ լինեն, կհայտարարենք, թե ինչպես կաշխատի համակարգը»:

Կառավարությունում հիշեցրին, որ ծրագրի ընթացքում հնարավոր է ընդլայնել այն նաև համատեղ քարտերի օգտագործման համար, ինչը ավելի լայն հարթակում հնարավորություն կտա խթանել անկանխիկ վճարումները։

Վերջում վարչապետն ընդգծեց. «Ծրագիրը ենթակառուցվածքային կարևոր ներդրում է մեր երկրի համար՝ հնարավորություն տալով զարգացնել ֆինանսական համակարգը և բարձրացնել քաղաքացիների ֆինանսական գրագիտությունը»: