Հայաստանում նշում են հրեշտակապետեր Գաբրիելի և Միքայելի և ողջ երկնային զորքի հիշատակության օրը
Այսօր՝ նոյեմբերի 8-ին, Հայ Առաքելական եկեղեցին նշում է հրեշտակապետեր Գաբրիելի, Միքայելի և ողջ երկնային զորքի հիշատակության օրը։
Հայ եկեղեցու ուսմունքի համաձայն՝ հրեշտակներն անմարմին էություններ են՝ օժտված բանականությամբ, ազատ կամքով, մշտաշարժ, անսեռ, անմահ և սպասավոր Աստծուն։ Հրեշտակները, որպես լույսի էակներ, ստեղծվել են արարչագործության առաջին օրը՝ լույսի հետ միասին։ Տիրոջ կամքով նրանք կոչված են ծառայելու մարդուն։ Այսպիսով, հրեշտակները սպասավոր հոգիներ են, որոնք, լինելով երկնքում, մասնակցում են նաև մարդու երկրային կյանքին, գործում են ժամանակի և տարածության մեջ՝ հոգ տանելով մարդու մասին։
Հրեշտակներին անվանում են նաև Աստծո պատգամավորներ, ում միջոցով փոխանցվում է Արարչի կամքը։ Սուրբ Գիրքը վկայում է, որ նրանք անթիվ բազմությամբ են։ Ըստ Սուրբ Դիոնիսիոս Արիսպագացու ուսմունքի՝ հրեշտակները բաժանվում են ինը դասի՝ Աթոռներ, Քերովբեներ, Սերովբեներ, Տերություններ, Զորություններ, Իշխանություններ, Պետություններ, Հրեշտակապետեր և Հրեշտակներ։
Գաբրիել անունը, որը նշանակում է «Աստծո ուժ», պատկանում է Բարձրյալի անմիջական ծառային, ում վստահված է մարդկանց բարձրագույն աստվածային հայտնությունները հասցնելը։
Միքայել անունը, որը նշանակում է «Ո՞վ է նման Աստծուն», Երկնային Թագավորի փառքի և նրա ժողովրդի պաշտպանն է, ով պայքար է մղում և կառավարում է հոգևոր աշխարհում։
Հայկական ավանդույթում հրեշտակները ոչ միայն խորհրդանշում են հոգևոր մաքրություն և լույս, այլև ծառայում են որպես կենդանի կապ Աստծո և մարդու միջև՝ օգնելով կողմնորոշվել հոգևոր կյանքում և ամրապնդել հավատը։