Գնաճ Հայաստանում․ ի՞նչն է թանկացել նոյեմբերին (Տվյալներ)

2025 թվականի նոյեմբերին Հայաստանում արձանագրվել է 3.1% գնաճ՝ նախորդ տարվա նույն ժամանակահատվածի համեմատ։ Մեկ ամսվա կտրվածքով գներն աճել են 0.6%-ով։ Հիմնական թանկացումները վերաբերում են պարենային ապրանքներին, հատկապես՝ յուղերին, ձկնամթերքին և մսամթերքին։

Այս մասին հայտնում է ՀՀ վիճակագրական կոմիտեն։

Պարենային ապրանքներ (+3.8%)

Պարենային ապրանքների և ոչ ալկոհոլային խմիչքների գները մեկ տարում աճել են 3.8%-ով, իսկ հոկտեմբերի համեմատ՝ 1.3%-ով։

Առավել զգալի թանկացումներն ըստ խմբերի․

• Յուղեր և ճարպեր՝ +11.5%
  • Արևածաղկի բուսայուղ՝ +15%
  • Կարագ՝ +11.9%
  • Մարգարին՝ +5.3%
• Ձուկ և ծովամթերք՝ +14.9%(իշխանը թանկացել է 13.7%-ով)։
• Սուրճ, թեյ, կակաո՝ +10.3%
  • Կակաո՝ +30%
  • Սուրճ՝ +10.7%
• Մսամթերք՝ +3.8%
  • Գառան միս՝ +13.5%
  • Խոզի միս՝ +9.9%
  • Տավարի միս՝ +4.2%
  • Թռչնամիս՝ +1.8%

Այլ թանկացումներ

• Հացաբուլկեղեն և ձավարեղեն՝ +3.5%(հնդկաձավարը՝ +7.9%, ալյուրը՝ +4.8%, հացը՝ +3%)։
• Կաթնամթերք, պանիր և ձու՝ +4.8%(թթվասերը՝ +8.6%, մածունը՝ +7.3%, պանիրը՝ +3.4%, ձուն՝ +3%)։
• Շաքար և քաղցրավենիք՝ +6.9%(ընդ որում շոկոլադը թանկացել է 12.2%-ով, իսկ շաքարավազն էժանացել է 1%-ով)։
• Ալկոհոլային խմիչքներ՝ +4.3%։
• Ծխախոտային արտադրանք՝ +8.5%։

Ի՞նչն է էժանացել

Միակ ապրանքախումբը, որտեղ տարեկան կտրվածքով գրանցվել է գնանկում, բանջարեղենն է՝ -7.8%։ Սակայն հարկ է նշել, որ մեկ ամսվա կտրվածքով (հոկտեմբերի համեմատ) բանջարեղենը թանկացել է 8.6%-ով՝ սեզոնայնությամբ պայմանավորված։

Ոչ պարենային ապրանքներ

Ոչ պարենային ապրանքների շուկայում գները տարեկան կտրվածքով աճել են 1.2%-ով, իսկ ամսական կտրվածքով՝ 0.5%-ով։