ԿԲ 2026-ի համար կանխատեսում է ՀՆԱ-ի 6,3-4,1% աճ ՝ ակնկալելով նաև արտաքին առևտրի աճ

Հայաստանի Կենտրոնական բանկը կանխատեսում է, որ 2026 թվականին երկրի համախառն ներքին արդյունքի (ՀՆԱ) աճը կկազմի 4,1-ից 6,3 տոկոս։ 2027 թվականին սպասվում է 4,9-5,3 տոկոս տնտեսական աճ՝ արտաքին առևտրի դինամիկայի բարելավման պայմաններում։

ԿԲ-ի գնահատմամբ՝ 2025 թվականին տնտեսական աճը կկազմի 5,9 տոկոս՝ համեմատելի 2024 թվականի փաստացի ցուցանիշի հետ։ Արդյունքում ՀՆԱ-ի անվանական ծավալը 2025 թվականին կհասնի շուրջ 11,2 տրլն դրամի՝ 2024 թվականի 10,2 տրլն դրամի դիմաց։ 2026 թվականին կանխատեսվում է ՀՆԱ-ի աճ մինչև 12-12,3 տրլն դրամ, իսկ 2027 թվականին՝ մինչև 13-13,3 տրլն դրամ։

Տվյալ կանխատեսումները ներկայացված են Կենտրոնական բանկի «2025 թվականի չորրորդ եռամսյակի դրամավարկային քաղաքականություն» զեկույցում։

2024 թվականից ԿԲ-ն տնտեսության կանխատեսումները իրականացնում է դրամավարկային քաղաքականության նոր կատարելագործված համակարգի՝ FPAS MARK II-ի շրջանակում։ Այդ մեթոդաբանությամբ ՀՆԱ-ի զարգացումները գնահատվում են երկու սցենարով՝ Case A և Case B։

Case A սցենարները ենթադրում են շուկայական սպասումներից բարձր տոկոսադրույքներ՝ հաշվի առնելով հնարավոր բարձր գնաճային ռիսկերը և անորոշությունները։ Այս սցենարի պայմաններում կանխատեսվում է պահանջարկի ընդլայնում և առաջարկի որոշակի զսպում։

Case B սցենարները, հակառակը, հիմնված են շուկայական սպասումներից ցածր տոկոսադրույքների վրա՝ գնանկումային կամ ցածր գնաճային միջավայրի հնարավոր ձևավորման պայմաններում։ Այդ դեպքում ակնկալվում է պահանջարկի զսպում և առաջարկի ընդլայնում։

ԿԲ-ի ներկայացրած սցենարները նպատակ ունեն ապահովել տնտեսության զարգացման տարբեր հնարավոր ուղիների համակողմանի գնահատում՝ ռիսկերի և անորոշությունների ազդեցությունը հաշվի առնելով։