Հենրիխ Մխիթարյանը՝ Հայաստանի ազգային հավաքականից հեռանալու մասին

Հայաստանի ազգային հավաքականի նախկին ավագ Հենրիխ Մխիթարյանը իր ինքնակենսագրական գրքում՝ «Իմ կյանքը միշտ ուշադրության կենտրոնում», մանրամասն պատմել է ազգային թիմից հեռանալու պատճառների մասին։

Ֆուտբոլիստը պատմել է, որ իր ճանապարհը հավաքականում տևել է մոտ 15 տարի,  նորամուտը նշել է Պանամայի դեմ խաղում, իսկ վերջին հանդիպումը անցկացրել է 2021 թվականի նոյեմբերի 14-ին Երևանում՝ Գերմանիայի դեմ խաղում, որն ավարտվել է 1:4 հաշվով պարտությամբ։

«Ոչ ոք չէր գիտակցում, որ դա կլինի իմ վերջին խաղը հավաքականում։ Ես ինքս որոշեցի դադար վերցնել, իսկ պաշտոնական հայտարարությունն արեցի միայն մի քանի ամիս անց»,  գրել է Մխիթարյանը։

Ապա կիսվել է, որ վերջին տարիներին նա ավելի հաճախ էր զգում ներքին անհարմարություն՝ գտնվելով ազգային հավաքականում։

«Վերջին տարիներին ես ինձ լավ չէի զգում հավաքականում, կարծես իմ տեղում չէի, թեև գիտեի, որ դա հենց այն վայրն է, որտեղ պետք է լինեմ։ Թիմի ներսում և նրա շուրջ մթնոլորտը փոխվել էր։ Երբեմն ինձ թվում էր, թե այլևս տեղ չունեմ այնտեղ՝ իմ սեփական տանը», — խոստովանել է ֆուտբոլիստը։

Բայց Մխիթարյանը հատուկ ընդգծել է, որ իր որոշումը կապված չէր որևէ կոնֆլիկտի կամ թիմակիցների հանդեպ անհարգալից վերաբերմունքի հետ. «Ես երբեք չեմ բղավել թիմակիցներիս վրա, երբեք նրանց մասին վատ բան չեմ ասել և երբեք հանդերձարանում անհարգալից վարք չեմ դրսևորել: Հավաքականում ընդունած բոլոր որոշումները միտված էին թիմի բարձր մակարդակը պահպանելուն։ Իմ ընդունած յուրաքանչյուր որոշում, այդ թվում՝ ավագության տարիներին, ուղղված էր մեկ բանի՝ թիմի մակարդակը պահպանել ինչպես խաղային, այնպես էլ հոգեբանական առումով», — հավելել է Մխիթարյանը։

Հայաստանի հավաքականի կազմում Հենրիխ Մխիթարյանը անցկացրել է 95 հանդիպում և խփել 32 գոլ։ Նա ազգային հավաքականի պատմության լավագույն ռմբարկուն է։