Երաժշտական աղոթք կեսգիշերին․ Վերդիի «Ռեքվիեմը»՝ նվիրված Հայոց ցեղասպանության զոհերի հիշատակին

Ապրիլի 23-ին 23:59-ին, Երևանում կհնչի իտալացի կոմպոզիտոր Ջուզեպպե Վերդիի Ռեքվիեմը: Համերգը կկայանա Արամ Խաչատրյան համերգասրահում՝ Հայաստանի ազգային ֆիլհարմոնիկ նվագախմբի և Հայաստանի ազգային ակադեմիական երգչախմբի կատարմամբ։

Միջոցառումը կազմակերպվել է ի հիշատակ Հայոց ցեղասպանության զոհերի։ Կեսգիշերին հնչող այս ստեղծագործությունը կդառնա երաժշտական աղոթք՝ լռության, հիշողության և խոհի մեջ՝ միավորելով հանդիսատեսին համազգային հիշողության շուրջ։

Վերդիի «Ռեքվիեմը» համարվում է հոգևոր երաժշտության գլուխգործոցներից մեկը, որը իր դրամատիկ հնչողությամբ և խոր զգացմունքային շերտերով հաճախ կատարվում է մարդկային ողբերգությունների հիշատակին նվիրված միջոցառումների ընթացքում։ Երևանյան այս համերգը ևս այդպիսի խորհրդանշական նշանակություն ունի՝ վերածվելով ոչ միայն մշակութային, այլև հիշատակի արարողության։

Կազմակերպիչները նշում են, որ միջոցառումը կոչված է ոչ միայն հարգանքի տուրք մատուցելու զոհերի հիշատակին, այլև հնարավորություն ստեղծելու հանրության համար՝ մի պահ լռության և ներքին վերապրման միջոցով վերաիմաստավորելու պատմական հիշողությունը։